مـن نحـن

حيا الله من جانا اسفرت وانورت والله
عساكم ان شاء الله استانستوا في مويقعنا و استفدتوا
ما يجهلكم اني امكم هيله داريه بس أبعّرفكم ببنيّاتي اللي زينوا هاللي شفتوا كله بسم الله عليهن

طبعاً ذا المويقع زينّوه علشان مادة تصميم الترّنت اللي يدرسونها في الجامعة(او الوب على ماقالوا) تبع قسم الحاسب الآلي الله يساعدهن
أبعددهن بالكبر علشان ما حدن يزعل والا تراهن كلهن مجتهدات و تساعدن في الشغل والا قصرن بشي

(هذي بنيتي نوف (تراها مهب الكبيره بس وش اسوي تطاقن البنات كلهن يبن يصيرن الصغيرات
الله مير يسلمها هي اللي ركـّضت في ذا المكتبات و جابت المعلومات و صور الفواكه و تمقلت في الكتب اليييين ما قالت  بس حتى تجيب لنا وش قالوا الناس في الأعشاب 
و فزعت لنا بكتابٍ وش زينه فيه معلومات وصور عن الابر الصينية عز الله ان القصيم جابت ذيبه اسمها نوف وش انحن بلاها


و هذي بنيتي فاطمة من الجنوب (لاياشيخه احسبها فرنسيه) بسم الله عليها الله لا يضرها هي 
اللي زينت الاختبار بالجافا و ركبت الصفحات حقته كلهن و ذا الازارير اللي تفغـّص و توديكم للسؤال 
اللي عقب 
و هي المخ المفكر حق الجافا حارسن يحرسها لا و جابت لنا طرائف الشعوب بعد اذكروا الله لا تنظلونها


و هذي بنيتي حياة سديراويه و هل خلق الله ديرتن كسدير :) خخخخ تنحط على الجرح يبرا 
 موب كني طلعت عن الموضوع- المهم بنيتي تعاونت هي ويا نوف على البحث وجابت لنا عن التداوي بالقرآن و رصصت معلومات الاعشاب على الصفحات كلمة كلمة يا بعد تسبدي مير طلع في اصابعها دمامل من كثر الكتابه
الله من النصب في هالعجوز--->


والحين عاد جينا لبنيتي القِعدة آخر العنقود عبير اصبروا اصبروا كود أتربّع حتى امدح صح خخخخخ اقول يا شين الغاريّه بنيّتي وابمدحها عندكم شي ؟؟ عاد هذي الغالية يااااااااااا جعل عيني ما تبتسيها هالسنعة هي 
اللي قطعت البصل و الفواكه (بالفوتوشوب قصدي والا الطبخ الله يخلف) و ادهرت في المقدمة خلتني احتسي(يعني اسولف هذي غير احتسي الشاهي لراعين الفصحى) هي اللي زبرقت  الديكورات
و حطت التصاميم والصور والاصوات يعني على ماقالوا (قرافكال ديزاينر) و جابت قاموس الاعشاب
ههههه ايه تحسبوني سهله يوم اقول (قرافكال ديزاينر) لا تضيحكون تراي اعرف انقلينزي تتحدوني اقول : وشلونكم بالانقلينزي؟؟

وشلونكم بالانقلينزي :) هه هذاني قلتها خخخخخخخ

عاد حتى نصير حقـّانيّين مره ترى برنامج البحث ما زيناه لحالنا ، ساعدتنا وحدة ٍ من بنيّاتي عيّت علينا نقول اسمها مير الله 
يعافيها يوم كسبت فينا أجر و تراها ما سرقته لا منـّا والا مناك بسم الله عليها إلا هي مخترعته و علمتنا وش يقال به جعلها في الجنة ووالديها وكل مسلم


و ما ننسى نشكر الفنان جهز الهمزاني مرتن اخرى على رسوماته الزينه يوم انه خلاني طخماء ً أهبـّل ليت رَجلي ابو  صالح حيّ للحين .. تسان اقول له حسافة هالزين عليك يالهيس الأربد بس اشوى ان الله فكـّه و مات  خخخخخخخخ

عاد هالحين نبي نشكركم يوم انكم شرّفتونا بجيّتكم هو صحيح اننا كرفنا كرف الويل علشان يطلع الموقع بهالشكل المتواضع اللي تشوفونه و صحيح اننا زلبّنا بباقي المواد (الا وش نازل لنا في الجدول تراي ماشفت غير الوب) لذلك نبيكم تتوسطون لنا عند الاستاذات الله يوفقهن وينصر الاسلام والمسلمين
على اليهود جزرن يجزرهم (وش جاب الطاري) حتى ننجح بتقديرن يواجه في مادة التصميم و بالمرة ننجح في باقي مواد الترم اللي ما درينا عنها بسبب القعدة على النت
): الشكوى على الله

(: و .. و وبس سلام عليكم